Ye Kaisi Judaai...

Ek Patta,
Abhi-Abhi toota tha,
Na jaane kisse wo rootha tha...
Janana chaha tha mene bahut kuch,
Par samajh na paayi, zehan mein uske kya tha!!

Pehle rootha tha bas ek,
dekhte hi dekhte bikhar gaye anek,
Na koi ilm thi, na jaanti thi kaaran unki maayusi ka,
Par sochti thi...aisa bhi kabhi hota hai,
bhala koi apno se judaa hota hai??

Ajeeb Maayusi, ek ajeeb udaasi thi wahaan,
Sukhe patton ko udaati thi hawaa..
Sarsarahat karte hue tez hawaa ke zaunke,
patton ko ped se alag karte jaate,
Gussa tha hawaa ka ya thi patzad ki shuruwaat,
jo le jaati hazaaron patte apne saath.!!!

Janana chaha tha mene bahut kuch,
samjhane lagi thi shaayad mein ab kuch,
Behti hawaa ke zaunke, bayaan karte jaate sachchaii..
Unhi ke kaaran sehni padi thi, ped aur patton ko ye judaaii...

Par Vaastav mein kise doshi maane aur kise maane nirdosh,
ye to prakriti ka khela hai,
jisne hawaon ke rukh ko moda hai.
Baanta hai baras ko mausam mein chaar,
Patjhad, Saawan, Basant, Bahar...

Patjhad ke kaaran jo judaai hoti hai,
Saawan ki pehli boondein un gamon ko dhoti hai,
Chuu....kar jaati hai, us maayusi ko.

Haule se kehti hai kaan mein pedon ko,
Udaasi tumhaari khatakti hai sabhi ko,
Muskurake khila do phir se zameen ko,
Saawan mein ram jaao, geet gaao saawan ka..
Aaage bhi to karna hai tumhe swaagat basant ka...

By - Rachana Maheshwari